തെങ്ങിന്‍ തൈകളുടെ പരിപാലനം.
ദീര്‍ഘകാല വിളയായ തെങ്ങിന്റെ വളര്‍ച്ചയുടെ ആദ്യഘട്ടത്തില്‍ സംഭവിക്കുന്ന കോട്ടങ്ങള്‍ പിന്നീടൊരിക്കലും നികത്താന്‍ സാദ്ധ്യമല്ല. അതുകൊണ്ട് തന്നെ ഈ പ്രായത്തിൽ ശ്രദ്ധ കുറഞ്ഞാല്‍ വളര്‍ച്ചയും കുറയും. തൈ തെങ്ങുകളുടെ ആദ്യത്തെ 3 വര്‍ഷങ്ങളിലുള്ള പരിചരണം വളരെയേറെ പ്രാധാന്യമര്‍ഹിക്കുന്നു.
കൃഷിയിടം ഒരുക്കല്‍
നല്ല നീര്‍വാര്‍ച്ചയുള്ള മണ്ണാണ് തെങ്ങു കൃഷിക്ക് യോജിച്ചത്. ധാരാളം സൂര്യപ്രകാശം ലഭിക്കുന്ന കൃഷിയിടങ്ങളാണ് തൈ നടാനായി തെരഞ്ഞെടുക്കേണ്ടത്. ചെരിവുള്ള പ്രദേശങ്ങളില്‍ മണ്ണ്-ജല സംരക്ഷണ മാര്‍ഗങ്ങള്‍ അവലംബിക്കണം. താഴ്ന്ന പ്രദേശമാണെങ്കില്‍ കൂനകള്‍ ഉണ്ടാക്കി വേണം തൈകള്‍ നടേണ്ടത്. തൈകള്‍ വളരുന്നത് അനുസരിച്ച് മണലും എക്കലും മണ്ണും തൈകള്‍ക്ക് ചുറ്റുമിട്ട് തറ ഉയര്‍ത്തേണ്ടതാണ്.
മണ്ണിന്റെ ഘടനയനുസരിച്ച് കുഴിയെടുക്കുന്നതും വ്യത്യാസപ്പെട്ടിരിക്കും. മണ്ണാണെങ്കിൽ 1 x1 x1 മീറ്റര്‍ നീളവും വീതിയും ആഴവുമുള്ള കുഴിയെടുക്കണം അതേ സ്ഥാനത്ത് വെട്ടുകല്‍ പ്രദേശങ്ങളില്‍ 1.2 x1.2 x1.2 മീറ്റര്‍ നീളവും വീതിയും ആഴവുമുള്ള കുഴിയെടുക്കേണ്ടിവരും. ചെങ്കല്‍ പ്രദേശങ്ങളില്‍ തൈകള്‍ നടുന്നതിന് ആറുമാസം മുമ്പ് കുഴികളെടുത്ത് 2 കിലോ വീതം കറിയുപ്പ് ഇടുന്നത് മണ്ണ് അയവുള്ളതാക്കും.
നടീല്‍ അകലം
തൈകള്‍ തമ്മില്‍ നിശ്ചിത അകലം നല്‍കേണ്ടത് അത്യാവശ്യമാണ്. സൂര്യപ്രകാശം,മണ്ണ്,ജലം, വായു എന്നീ പ്രകൃതി വിഭവങ്ങളുടെ ഉപയോഗം പരമാവധി പ്രയോജനപ്പെടുത്താനും പരസ്പര മത്സരം ഒഴിവാക്കാനും നല്ല വിളവ് ലഭിക്കാനും ഇത് സഹായിക്കും. ഉയരം കൂടിയ ഇനങ്ങള്‍ക്ക് ശുപാര്‍ശ ചെയ്തിട്ടുള്ള അകലം 8 മീറ്ററാണ്. എന്നാല്‍ കുറിയ ഇനങ്ങള്‍ നടുമ്പോള്‍ തൈകള്‍ തമ്മില്‍ 6 മീറ്റര്‍ അകലം മതിയാകും.
തൈ നടുന്നതിന് മുമ്പ് മേല്‍ മണ്ണും ചാണകപ്പൊടിയും ചാരവും കലര്‍ന്ന മിശ്രിതം കുഴിയുടെ 60 സെ.മീ വരെ നിറയ്ക്കണം. അതിന് കൃത്യം നടുവിലായി ഒരു ചെറിയ കുഴി എടുത്ത് തൈ നടാം.
സംയോജിത വളപ്രയോഗം
ശരിയായ വളര്‍ച്ചയ്ക്കും നേരത്തെ പുഷ്പിക്കുന്നതിനും കായ്ക്കുന്നതിനും നല്ല ഉത്പാദനം ലഭിക്കുന്നതിനും തൈകള്‍ നടുന്ന വര്‍ഷം തന്നെ വളപ്രയോഗം നടത്തണം. നട്ട മൂന്ന് മാസം കഴിഞ്ഞ് ആദ്യത്തെ വളപ്രയോഗം നടത്താം. കുഴിയില്‍ തൈയ്ക്ക് ചുറ്റും ഇട്ട് മണ്ണില്‍ ഇളക്കി ചേര്‍ക്കണം. 3-5 കി.ഗ്രാം ജൈവവളം( ചാണകപ്പൊടി, ആട്ടിൻ കാഷ്ഠം, മണ്ണിരക്കമ്പോസ്റ്റ്) , ആദ്യവര്‍ഷം ഓരോ മൂന്ന് മാസം കൂടുമ്പോഴും 2 കി.ഗ്രാം വീതവും 2 ാം വര്‍ഷം മുതൽ ഓരോ മൂന്ന് മാസം കൂടുമ്പോഴും 3 കി.ഗ്രാം വീതവും പിന്നീടുള്ള വര്‍ഷങ്ങളില്‍ ഓരോ മൂന്ന് മാസം കൂടുമ്പോഴും 5 കി.ഗ്രാം വീതവും ജൈവ വളങ്ങൾ കൂടി ചേര്‍ത്ത് കുഴിയുടെ ഉള്‍ഭാഗം അരിഞ്ഞിറക്കി ഭാഗികമായി മൂടണം.
കീടരോഗ നിയന്ത്രണം
തൈ തെങ്ങുകളില്‍ ആക്രമണം നടത്തുന്ന പ്രധാന കീടമാണ് കൊമ്പന്‍ ചെല്ലി. നെടിയ ഇനങ്ങളെ അപേക്ഷിച്ച് കുറിയ ഇനങ്ങളിലാണ് ചെല്ലിയുടെ ആക്രമണം കൂടുതലായി കാണുന്നത്. ചെല്ലി നാമ്പോലയും കൂമ്പുഭാഗവും ആക്രമിക്കുന്നതിനാല്‍ തൈകള്‍ പൂര്‍ണ്ണമായും നശിക്കാനിടവരും. അതിനാല്‍ ചെല്ലിക്ക് എതിരായ പരിപാലന മുറകള്‍ കൃത്യസമയത്ത് തന്നെ ചെയ്യണം. കീടത്തിന്റെ ആക്രമണം തടയാന്‍ മുന്‍കരുതലായി 250 ഗ്രാം പൊടിച്ച മരോട്ടി പിണ്ണാക്ക് അല്ലെങ്കില്‍ വേപ്പിന്‍ പിണ്ണാക്ക് തുല്യ അളവില്‍ മണലും കൂട്ടിക്കലര്‍ത്തിയ മിശ്രിതം നാമ്പോലക്കവിളില്‍ ഇട്ട് കൊടുക്കണം. ഇതിനു പകരം വലിയ പാറ്റാ ഗുളിക 2 എണ്ണം ഓലക്കവിളില്‍ വച്ച് മണല്‍ കൊണ്ടു മൂടുന്നതും ഫലപ്രദമാണ്. മൂന്ന് മാസത്തിലൊരിക്കല്‍ പാറ്റാഗുളിക മാറ്റി വയ്ക്കാന്‍ ശ്രദ്ധിക്കണം. ഫെര്‍ട്ടറ/ഫിപ്രോണില്‍ എന്ന കീടനാശിനി 3-5 ഗ്രാം സുഷിരങ്ങളിട്ട ചെറുപോളിത്തീന്‍ കവറുകളിലാക്കി ഓലക്കവളില്‍ വെയ്ക്കുന്നതും ഫലപ്രദമാണ്.
ജലസേചനം
തെങ്ങ് കൃഷിയിൽ ജലസേചന സൗകര്യം വളരെ പ്രധാനപ്പെട്ട ഒരു ഘടകം തന്നെയാണ്. നട്ട് കഴിഞ്ഞാൽ ആദ്യത്തെ രണ്ടു മാസം ദിവസേന രണ്ടു നേരമായി 10 ലിറ്റർ വെളളമെങ്കിലും നൽകേണ്ടി വരും. പിന്നീട് ദിവസേന ഒരു നേരം നനയ്ക്കാൻ സാധിച്ചാൽ തൈകളുടെ ആരോഗ്യപരമായ വളർച്ച ഉറപ്പ് വരുത്താൻ സാധിക്കും. നട്ട് കഴിഞ്ഞാൽ കരിയിലകൾ കൊണ്ട് പുതയിടീൽ നിർബന്ധമാണ്.
